काठमाडौ ,मंसिर ,६,   नेपाल ट्रेड युनियन कांग्रेसको राष्ट्रिय परिषद भव्य उदघाटन भएको छ । नेपाली कांग्रेसका सभापति शेर बहादुर देउवाले परिषदको उदघाटन गर्नु हुदै नेकपाको सरकारले संवैधानिक आयोगहरुलाई शाही आयोग बनाउन खोजेको आरोप लगाउनु भएको छ ।

हरेक निकायलाई आफु अनुकुल बनाई शाही आयोग बनाउने खोजे पनि त्यो अभिष्ट पुरा हुन नदिने बताउनु भयो । उहाँले भन्नु भयो –सरकारको इशारामा नचल्ने सबैलाई दुख दिन थालेको अभाष भएको छ । यस्ता प्रजातन्त्र विरोधी कार्यको कांग्रेस डटेर विरोध गर्छ । वरिष्ठ नेता रामचन्द्र पौडेलले कम्युनिष्टहरु श्रमिक आन्दोलनबाट सत्तामा पुग्ने र सत्तामा पुगेपछि श्रमिकलाई नै दुख दिने भएकोले नेपालमा पनि सरकार श्रमिक विरोधी हुन खोजेको आरोप लगाउनु भयो ।

अन्तर्राष्ट्रिय ट्रेड युनियन महासंघ एसिया प्रशान्त क्षेत्रका महासचिव शोया योशुदाले अहिले संसारभर सामाजिक समानता आवश्यक रहेकोले र श्रम क्षेत्रको समस्या समाधान गर्न तिनै पक्ष मिल्नु पर्ने बताउनु भयो । ट्रेड युनियन कांग्रेसका अध्यक्ष पुष्कर आचार्यले वर्तमान सरकारले श्रमिकको अधिकार कुन्ठित गर्न खोजेको,सबै निकायहरुलाई आफुले भने अनुसार चलाउन खोजेको र आस्थाको आधारमा श्रमिकलाई दुख दिन थालेकाले प्रजातन्त्र विरोधी हुन खोजेको आरोप लगाउनु भयो । उद्योग परिसंघका प्रतिनिधी राजेश अग्रवाल र उद्योग वाणिज्य महासंघका प्रतिनिधि चन्द्रा ढकालले सामाजिक सुरक्षा लागु गर्न प्रतिबद्ध रहेको बताउनु भयो ।

जेटियुसिसिका अध्यक्ष विनोद श्रेष्ठले श्रमिकको अवस्था सुधार गर्न सबै ट्रेड युनियनहरु संगै काम गरिरहेको बताउनु भयो । ट्रेड युनियन कांग्रेसका निवर्तमान अध्यक्ष खिलानाथ दाहालले अनौपचारिक क्षेत्रमा सामाजिक सुरक्षा लागु हुनु पर्ने बताउनु भयो । आईएलओ का निर्देशक रेचार्डले पुर्व तयारीको कमिले एक वर्ष अगाडी घोषणा गरेको सामाजिक सुरक्षा प्रभावकारी लागु नभएको बताउनु भयो । कार्यक्रममा युनि एसियाका महासचिव कृस्टिफर, डब्लुएसएमका ब्रुनो,आईटिफका संगम, बिडब्लुआईका प्रतिनिधिहरुले नेपालको ट्रेड युनियन आन्दोलन र ट्रेड युनियन कांग्रेसको प्रसंशा गर्नु भयो । यसैगरी काउनका अध्यक्ष जेबि गुरुङ , कारखाना श्रमिक संघका अध्यक्ष अमृतलाल जोशी र स्वास्थ्यकर्मी संघका अध्यक्ष रामजी घिमिरेले सरकार श्रमिक विरोधी बन्दै गएको आरोप लगाउनु हुदै श्रमिकको नारा लगाउने सरकारले अनौपचारिक क्षेत्रमा सामाजिक सुरक्षा लागु गराउनु पर्ने बताउनु भयो ।

परिषद विहिबार शुरु भई शुक्रवार बन्द सत्रमा विभिन्न श्रम क्षेत्रका मुद्दाहरुमा केन्द्रित रहि छलफल र निर्णय गरि टुंगिने प्रचार प्रसार विभाग प्रमुख बलदेव तामाङले जानकारी दिनु भयो ।