धुलिखेल नगरपालिका वडा नम्बर १ देवीटार स्वास्थ्य चौकी जाँदै गरेका दुई जना स्वास्थ्यकर्मी घाइते भएका छन् । आज भ्याक्सीन लैजाने क्रममा स्वास्थ्य चौकी प्रमुख शुरेस घिसिङ र स्वास्थ्यकर्मी प्रदिप वाइवा मोटरसाइकल दुर्घटना परी गम्भिर घाइते हुनु भएकाे नगरपालिकाका स्वास्थ्य शाखा प्रमुख सन्दिप केसीले जानकारी दिनुभयो ।
घाईते दुबै जनाको धुलिखेल अस्पतालमा उपचार भैरहेको छ । स्वास्थ्यकर्मी चढेको मोटरसाइकल खोस्लामा खसेको छ । स्वास्थ्यकर्मी घाईते भएपनि देवीटारमा खोप कार्यक्रम भने नरोकिएको स्वास्थ्य शाखा प्रमुख केसीले बताउनुभयो ।
आज वडा नम्बर १ मा १४५ जनाले खोप लगाएका छन् । स्वास्थ्य शाखा प्रमुख केसीका अनुसार धुलिखेल नगरपालिकाको वडा नम्बर१-८ सम्मका १ हजार ३९३ महिला र १ हजार २२४ जना पुरुष गरी जम्मा २ हजार ६१७ जना कोरोना भाईरस विरूद्धको खोप लगाएका छन् ।