शुक्रबार, बैशाख ७, २०८१
पहिलो पटक निर्धारण गरिएको समयावधि भित्र वडा अधिवेशन नभएपछि निराश बनेका कांग्रेस काभ्रेका कार्यकर्ताहरू फेरी खुशी भएका छन् । अधिवेशनको दोस्रो संशोधित कार्यतालिका आएपनि कांग्रेस कार्यकर्ताहरू सक्रिय भएका छन् ।
यसअघि १८ गते देखि सुरू भएको वडा अधिवेशन २५ गतेसम्म चलेको थियो । तर काभ्रे सहित २० वटा जिल्लामा भने उक्त समयमा वडा अधिवेशन नभएपछि कार्यतालिका संशोधन गरिएको हो । संसोधित कार्यतालिका अनुसार २० जिल्लामा असोज ५ गते वडा अधिवेशन हुनेछ ।
काभ्रेमा गणेश लामा पक्षीय क्रियाशील सदस्यको नाम पूर्व सभापति शिव हुमागाईले काटेपछि तोकिएको समयमा अधिवेशन हुन नसकेको हो । ८ सय क्रियाशील सदस्यमा ५ सय क्रियाशील सदस्यको नाम काटेको बताईएको छ ।
कांग्रेसको पनि वडातहसम्मै गुटको प्रभाव निकै परेको छ । जिल्लामा १३५ वटा वडा रहेका छन् । ती मध्ये निकै कमैमा मात्र सर्वसम्मत वडा सभापति चयन हुने देखिएको छ । अधिकांश वडामा गुटगत उम्मेदवार खडा गरिएको छ ।
जिल्लामा पूर्व सभापति शिव हुमागाई र वर्तमान सभापति मधु आचार्य समूहकै बढी प्रतिस्पर्धा हुने देखिएको छ । त्यसमा गणेश लामाको समूह निर्णायक हुनेछ । निर्वाचन क्षेत्र नम्बर १ का वडाहरूमा गणेश लामा बढी निर्णायक देखिएका छन् । उनले समर्थन गर्ने शिव हुमागाई वा मधु आचार्य पक्षका उम्मेदवारले सहज जित निकाल्नेछन् । लामाको समर्थन आचार्य समूहलाई रहेको बताईएको छ ।
