काभ्रेको पनैती नगरपालिकाले नगरमा कार्यारत महिला सामुदायिक स्वास्थ्य स्वंयम सेविकालाई नगद सहित बिदाई गरेको छ ।
आज महिला सामुदायिक स्वास्थ्य स्वयंसेविका दिवसको अवसरमा नगरपालिकाले यो कार्यक्रम गरेको हो । स्वास्थ्य क्षेत्रमा सामुदायिक स्वास्थ्य स्वयंसेविकाले गरेको योगदान र उनीहरूको सम्मान गर्दै सेवा अवधि सकिएका १८ जना स्वास्थ्य स्वयंसेविकालाई नगर सहित बिदाई गरिएको नगरपालिकाको स्वास्थ्य शाखाका संयोजक पुरुषोतम तिमल्सीनाले जानकारी दिनुभयो ।
सेवा अवधि सकिएका स्वयंसेविकालाई सरकारले उपलब्ध गराउने २० हजार र त्यसमा नगरपालिकाले ३० हजार थपेर एकमुष्ट ५० हजार रुपौयाको चेक नगर प्रमुख भिम प्रसाद न्यौपानेले हस्तान्तरण गर्नुभएको थियो ।
यस्तै महिला स्वास्थ्य स्वयंसेविका नगर स्तरीय कोषले पनि बिदाई गरिएका प्रत्येकलाई ११ सय रुपौया उपलब्ध गराएको थियो । स्वास्थ्य शाखाका संयोजक तिमल्सीनाका अनुसार नगरपालिकाले हरेक वर्ष स्वास्थ्य क्षेत्रमा गरेको कामको आधारमा उत्कृष्ट स्वयंसेविकाको रुपमा पनि घोषणा गर्दै आएको छ ।
यो वर्ष पनि नगरपालिकाले उत्कृष्ट स्वयंसेविकाकको रुपमा १० जनालाई घोषणा गरेको छ । सरकारले प्रति महिला स्वास्थ्य स्वयंसेविकाका लागि वार्षिक पोशाक खर्च १० हजार, यातायात खर्च १२ हजार उपलब्ध गराउँदै आएको छ ।