काभ्रे : तेमाल बृहत सुख्खा क्षेत्र खानेपानी आयोजना अन्तर्गत पहिलो चरणको काम सकिएको छ । पहिलो चरण अन्तर्गत मुहानको सबै काम सकिएको छ । त्यस्तै मुहान देखि मुख्य ट्याङकी रहेको ठाउँ याङमेल डाँडामा पानी खसाल्ने काम समेत भइसकेको छ ।

त्यस्तै २३ वटा ट्याङकी मध्ये ११ वटामा अबको एक हप्ता भित्र पानी संकलन गर्न मिल्ने चन्द्रा एण्ड बसन्त कम्पनीका बसन्त चन्दले जानकारी दिनुभयो । पहिलो चरणको काम सकिएकोपछि आज काभ्रे संघीय निर्वाचन क्षेत्र नम्बर १ का सांसद गंगा बहादुर दोङ बमध्वजको नेतृत्वमा अनुमन गरिएको छ ।

अनुगमनमा सांसद दोङसँगै खानेपानी तथा ढल ब्यवस्थापन विभागको सिनियर डिभिजनल इन्जिनियर रामेश्वर घिमिरे, संघीय खानेपाती तथा ढल ब्यवस्थापन आयोजना भक्तपुरका प्रमुख राजेन्द्र श्रेष्ठ, कन्सल्ट्रन्ट इन्जिनियर पारस तिमल्सिना, पत्रकार र स्थानीय उपभोक्ताहरु सहभागि हुनुभएको थियो ।

तेमाल बृहत सुख्खा क्षेत्र खानेपानी आयोजनाको मुहान गत असार १, साउन १७, १८ र १९ गते सुनकोशी नदीमा आएको बाढीले क्षति गरेको थियो । निकै मेहेनतपछि मुहानलाई पुरानै अवस्थामा फर्काएर पानी प्रशोधनको काम अहिले धमाधम भइरहेको छ । प्रशोधन केन्द्रबाट मुख्य ट्याङकीसम्मको पाइपमा सफल परीक्षण समेत भइसकेको छ ।

सांसद दोङले मुहानको प्रशोधन केन्द्र देखि याङमेल स्थित मुख्य ट्याङकीको अवलोकन गरी पछि शुद्ध पानी पिउने तेमालबासी जनताको इच्छा पुरामा हुनेमा आफु विश्वस्त रहेको बताउनुभयो ।

‘बाढीपछि मुहान क्षेत्रको हेर्दा पुग्दा म निकै निराश भएको थिए । तर आज लगभग पुरानै अवस्थामा मुहान देख्न पाइयो । सुनकोशीको पानी प्रशोधन भएर याङमेल डाँडामा समेत खसेको प्रत्यक्ष देख्न पाउन निकै खुशी लागेको छ । अब छिट्टै तेमालका सबै नागरिकको घर घरमा पानी पुग्नेछ भन्ने विश्वास लिएको छु । त्यसका लागि मैले गर्नु पर्ने पहल गर्न प्रतिबद्ध छु । सांसद दोङले भन्नुभयो ।’

खानेपानी तथा ढल ब्यवस्थापन विभागका सिनियर डिभिजनल इन्जिनियिर घिमिरेले निर्माण कम्पनीलाई यहि चैत महिनासम्मको मात्रै म्याद रहेको जानकारी दिनुभयो । ‘पछिल्लो समय काम निकै रफ्तारमा भइरहेको छ । यही गतिमा काम निरन्तर भइरह्यो भने हामीले यहि वर्षको चैत महिनाभित्र पानी वितरणको काम सकिसक्छौँ । त्यसका लागि सबैले आ आफ्नो ठाउँबाट पहल गर्न आवश्यक छ । घिमिरेले भन्नुभयो ।’

संघीय खानेपाती तथा ढल ब्यवस्थापन आयोजना भक्तपुरका प्रमुख राजेन्द्र श्रेष्ठले आयोजनाको कामलाई जतिसक्दा छिटो सकाएर काकाकुल अवस्थामा रहेको तेमालमा शुद्ध पानी वितरण गर्न आफुहरु पनि लागिपरेको बताउनुभयो ।

‘पहिलो चरणको काम सकिएपछि धेरै नै आश पलाएको छ । अब पाइप लाइन बिछ्याउने काम मात्रै बाँकी छ । यसलाई पनि छिटो भन्दा छिटो सकाएर घर घरमा पानी पुर्याउन हामी जुटिरहेका छौँ । श्रेष्ठले भन्नुभयो ।’

निर्माण कम्पनीको बसन्त चन्दले उपभोक्ता समितिले गर्नुपर्ने १० प्रतिशत बापतको काम अघि बढाए आफुहरुको काम लगभग अन्तिम चरणमा पुगेको बताउनुभयो ।

‘हामीले गर्नुपर्ने काम लगभग अन्तिम चरणमा पुगेको छ । अब धेरै काम उपभोक्ता समितिले गर्नुपर्ने मात्रै छ । यदि उपभोक्ता समितिले आफ्नो दायित्व अनुसारको काम गर्ने हो भने यसै वर्षको चैत महिनाभित्र आयोजनाको सबै सकिएन्छ । घर घरमा पानी पुग्छ । चन्दले भन्नुभयो ।’

आयोजनाबाट तेमाल गाउँपालिका वडा नम्बर १ देखि ९ सम्म, नमोबुद्ध नगरपालिकाको वडा नम्बर ३, ४ र ५ तथा रोशी गाउँपालिकाको वडा नम्बर ७ पार्थलीका नागरिकले सुनकोशीका पानी खान पाउनेछन् । शुरुमा ८ हजार ३ सय ७४ घर धुरी सवेक्षण गरेपछि आयोजना सकिँदासम्म साढे ९ हजार पुग्ने अनुमान गरिएको छ ।