जिल्ला प्रशासन कार्यालय काभ्रेपलाञ्चोकले सेवाग्राहीलाई बार अनुसार सेवा प्रदान गर्ने भएको छ ।

को रो ना भाइरसको प्रभावका कारण सेवाग्राहीको भीडभाड नहुने गरी अर्को व्यवस्था नभएसम्मको लागि अत्यावश्यक बाहेकका सेवा बार अनुसार प्रदान गर्न लागिएको जिल्ला प्रशासन कार्यालय काभ्रेले जनाएको छ ।

आइतबारबाट बार अनुसार सेवा प्रवाह गरिने प्रशासनले जनाएको छ । जिल्लाको १३ वटा स्थानीय तहमध्ये चार वटा बाहेक अन्य स्थानीय तहहरुमा आलोपालो प्रणाली लागू हुने छ ।

जसमा धुलिखेल नगरपालिका र रोशी गाउँपालिकाका सेवाग्राहीलाई आइतबार, बनेपा नगरपालिका र बेथानचोक गाउँपालिकाका सेवाग्राहीलाई सोमबार, पनौती नगरपालिका, भुम्लु गाउँपालिकाका सेवाग्राहीलाई मङ्गलबार सेवा दिइनेछ ।

त्यस्तै पाँचखाल नगरपालिका र रोशी गाउँपालिकाका सेवाग्राहीलाई बुधबार, मण्डनदेउपुर नगरपालिका र बेथानचोक गाउँपालिकाका सेवाग्राहीलाई बिहिबार र नमोबुद्ध नगरपालिका र भुम्लु गाउँपालिकाका सेवाग्राहीलाई शुक्रबार सेवा दिने गरी व्यवस्था मिलाएको सहायक प्रमुख जिल्ला अधिकारी अमरदीप सुनुवारले बताए ।

जिल्लाका तेमाल खानीखोला, चौरीदेउराली र महाभारत गाउँपालिकाको हकमा भने सदरमुकाम टाढा रहेको भन्दै बार तोकिएको छैन । यीमध्ये तेमाल, खानीखोला र चौरीदेउराली गाउँपालिकाका बासिन्दाले सबै बार सेवा पाउने प्रशासनका सहायक प्रमुख जिल्ला अधिकारी सुनुवारले जानकारी दिए ।

महाभारत गाउँपालिकाको हकमा भने सम्पूर्ण सेवा इलाका प्रशासन कार्यालय देविटारमा उपलब्ध हुने सुनुवारले जानकारी दिए । अत्यावश्यक सेवाहरु शान्ति सुुरक्षा,मुद्धा र इमर्जेन्सी राहदानी लगायतका सेवाका लागि भने बार तोकिएको छैन् ।

यी सेवाहरु प्रशासनबाट ६ दिन नै लिन सकिनेछ । सेवा लिन आउँदा खोप कार्ड (मोबाइलमा फोटो तथा विद्युतिय छायाप्रति) अनिवार्य लिएर आउन पनि प्रशासनले आग्रह गरेको छ ।