काभ्रेमा कांग्रेस अन्ततः गठबन्धन नगर्ने सोचका साथ अघि बढेको छ । कांग्रेसले अहिले धमाधम वडामा उम्मेदवार टुंगो लगाउन थालेको छ । धुलिखेल नगरपालिकाको वडा नम्बर ५ र ६ मा आज मात्रै सर्वसम्मत वडाध्यक्षको उम्मेदवार टुंगो लगाएका छ ।

वडा नम्बर ५ मा भवसागर रन्जितकार र वडा नम्बर ६ मा बाहावाला वडाध्यक्ष सञ्जय कोजुलाई सर्वसम्मत वडाध्यक्षको उम्मेदवार बनाएको छ । त्यस्तै पाँचखाल नगरपालिका वडा नम्बर ४ मा पनि कांग्रेस बाहालवाला वडाध्यक्ष सुन्दर लामालाई नै आगामी निर्वाचनमा वडाध्यक्षको उम्मेदवार बनाउने सर्वसम्मत निर्णय गरेकोछ ।

कांग्रेसले वडाध्यक्षको मात्रै उम्मेदवारमा टुंगो लगाएको छैन् । वडा सदस्यहरुको पनि नाम टुंगो लगाएको छ । कांग्रेसले आज जिल्लाको धेरै जसो वडाहरुमा बैठक राखेर उम्मेदवारमा पहिलो चरणको सहमति जनाउने काम गरेको स्रोतको दाबी छ ।

भोलीसम्ममा माथिल्लो निकायमा वडा तहका उम्मेदवारको नाम सिफारिस गर्न भएको आन्तरिक सर्कुलेशन अनुसार आज काभ्रेको सबै जसो वडामा कांग्रेसको बैठक बसेको छ । यसबाट पनि काभ्रेमा कांग्रेसले गठबन्धन गर्न नचाहेको प्रष्ट हुन्छ ।

अहिले धमाधम उम्मेदवारको नाम सिफारिस गर्ने र पछि गबन्धन हुँदा नाम फिर्ता लिनु पर्यो भने थप राजनीतिक बेइमानी हुने तर्फ काभ्रे कांग्रेसको नेतृत्व सजग नभएको देखिन्छ ।

काभ्रेमा गठबन्धनका लागि पर्सी २२ गते फेरी छलफल हुँदैछ । तर कांग्रेसले त्यो अघि नै प्रायजसो वडामा उम्मेदवार टुंगो लगाइसक्ने संकेत देखाइसकेको छ । कांग्रेस काभ्रे सबै पालिकामा जीत सुनिश्चित रहेको दाबी रहित संघीय सरकारको सत्ता साझेदार दलसंग गठबन्धन नगर्ने मनस्थितिमा पुगेको देखिन्छ ।

तर यो कांग्रेसको लागि एउटा भ्रम मात्रै हुनेछ । यदि काभ्रेमा गठबन्धन नगर्ने हो भने सबैभन्दा फाइदा एमालेले नै लिनेछ । गठबन्धन नहुने हो भने सम्भवतः एमाले फेरी पनि काभ्रेमा पहिलो दल बन्ने निश्चित छ ।

अहिले कांग्रेसले धमाधम वडाहरुमा उम्मेदवार टुंगो लगाएर माओवादी केन्द्र र नेकपा (एकीकृत समाजवादी) लाई गठबन्धन नगर्ने स्पष्ट संकेत दिन खोजेको पाइएको छ ।