रामेछाप जिल्लामा आज भएको बस दुर्घटनाका घाइतेको उपचारमा काभ्रे कांग्रेसले अग्रसरता लिएको छ ।

नेपाली कांग्रेस काभ्रे जिल्ला सभापति तीर्थ लामा सहित कांग्रेस काभ्रेका नेताहरुको टोलीले धुलिखेल अस्पतालमा पुगेर घाइतेहरूको अवस्था बुझेको हो । बस दुर्घटनाका अधिकांश घाइतेको धुलिखेल अस्पतालमा उपचार भइरहेको छ ।

कांग्रेस काभ्रेका नेताहरुले धुलिखेल अस्पतालमा उपचार सम्भव नभएका घाइतेलाई अन्य अस्पतालमा रिफरका लागि समेत पहल गरेका छन । संविधानसभा सदस्यसमेत रहेका जिल्ला सभापति लामा, प्रमुुख जिल्ला अधिकारी हुमकला पाण्डे, काभ्रेका प्रहरी प्रमुख एसपी चक्रराज जोशी, कांग्रेस जिल्ला सदस्य चेत लामा, कांग्रेस तेमाल गाउँपालिका सभापति ज्ञानबहादुर लामालगायतको टोलीले घाइते र आफन्तहरूलाई भेटेर सान्त्वना दिँदै उपचारमा कमी हुन नदिने प्रतिबद्धता व्यक्त गरेका छन ।

रामेछाप जिल्लाको सुनापती गाउँपालिका वडा नम्बर ३ हिलेदेवीबाट काठमाडौंतर्फ जाँदै गरेको बा ३ख ८३९६ नम्बरको यात्रुबाहक बस आज बिहान खाँडादेवी गाउँपालिकाको वडा नम्बर १ लुभुघाटमा दुर्घटना भएको थियो।

बस सडकको मोडबाट करिब सय मिटर तल खस्दा नौजनाको घटनास्थलमै मृत्यु भएको थियो भने २४ जना घाइते भएका थिए। दुर्घटना भएको बसमा रामेछाप र काभ्रेका यात्रु सवार रहेका थिए। घाइतेलाई हेलिकोप्टर, एम्बुलेन्स र जिपमार्फत धुलिखेल अस्पताल ल्याइएको थियो । हालसम्म बस दुर्घटनामा परी मृत्यु हुनेको संख्या १३ पुगेको छ।