काभ्रेको बनेपामा रहेको जग्गा किर्ते कागज बनाइ बिक्री गरेको पाइएको छ । बनेपा नगरपालिका वडा नम्बर ५ मा अर्काको नाममा रहेको ७६ कित्ता मध्य केहि कित्ता जग्गा किर्ते कागज बनाइ १ करोड १० लाखमा बिक्रि गरिएको हो ।
किर्ते कागज बनाइ उक्त जग्गा बिक्री गर्ने धादिङ जिल्लाको जिवनपुर ५ घर भई काभ्रेको बनेपा बस्दै आएका रबि प्रसाद रेग्मीलाई काभ्रे प्रहरीले पक्राउ गरेको छ ।
रेग्मीले किर्ते कागज बनाइ ४ जनालाई जग्गा बेचेका हुन् । रेग्मीले गत असार ३१ गते जग्गा धनि पुर्जा (लालपुर्जा ) किर्ते बनाएर मालपोत कार्यालय काभ्रेका कर्मचारीको समेत मिलेमतोमा जग्गा पास गरेको पाइएको हो ।
उनले किर्ते बनाएर पास गरेको जग्गाको कित्ता जिल्ला मालपोत कार्यालय काभ्रेमा हेर्दा बास्तबिक जग्गा धनिकै नाममा रहेको छ । धुलिखेल स्थित किर्ते कागज बनाउने भूसेवा कार्यालयमा आज प्रहरीले छापा समेत मारेको थियो ।
प्रहरीले उक्त कार्यालय छापा मार्दा कार्यालयमा रहेको फोटो कपि मेसिन, ल्यापटप तथा सयौँ लालपुर्जा समेत जफत गरेको छ । जग्गा कारोबारमा अन्यको पनि संग्लनता रहेको हुन सक्ने भन्दै अनुसन्धान जारि रहेको जिल्ला प्रहरी कार्यलय काभ्रेले जानकारी दिएको छ ।