सबैको समाचार
शुक्रबार, चैत्र १६, २०८०
  • होमपेज
  • अब मोबाइल एपबाटै ट्याक्सी बुकिङ सेवा

अब मोबाइल एपबाटै ट्याक्सी बुकिङ सेवा

3055
Shares
अब मोबाइल एपबाटै ट्याक्सी बुकिङ सेवा

चाहिएकै समयमा आफ्नो एरियामा ट्याक्सी नपाउने समस्या सामान्यजस्तै भइसकेको छ । झन मिटरमा जानै नमान्ने र बढी भाडा असुल्ने प्रवृत्तिबाट यात्रुहरु दिक्क छन् । तर, अब भने तपाईले आफूलाई ट्याक्सी चाहिएकै बेला अनलाइन स्मार्ट एपमार्फत बुकिङ गर्न सक्नुहुने छ ।
नेपालमा अहिले ‘अन्भर स्मार्ट ट्याक्सी’ मोबाइल एप प्रचलनमा आएको छ । यसबाट जोसुकैले ट्याक्सीलाई आफू भएको स्थानमा बोलाउन सक्छन् । यी ट्याक्सीले अरुले जस्तो किच(किच गर्ने छैनन् र मिटरकै आधारमा उठेको रकम लिनेछन् ।
एपमार्फत सेवा दिन २ सय वटा स्वरोजगार ट्याक्सी चालक अन्भरमा दर्ता भएका छन् । यी ट्याक्सीले एपमार्फत आएको अनुरोधअनुसार तपाईंलाई सेवा दिनेछन् । अन्भरमा संस्थापक ओम खड्काका अनुसार यसमार्फत सेवा दिने ट्याक्सीहरुलाई जीपीएस ट्रयाकिङ गरिएको छ ।
उनीहरुले सेवा दिइरहेको समयमा त्यसलाई ‘अन’ राख्छन् । एपमार्फत यात्रुले अनुरोध गरेपछि उनीहरु म्यापका आधारमा सेवाका यात्रु भएकै स्थानमा पुग्छन् ।
कसरी प्रयोग गर्ने ?
यो एप डाउनलोड गरेपछि यसमा यात्रुले एकपटक मोबाइल नम्बर, इमेल र पासवर्ड राखेर रजिष्टर गर्नुपर्छ । त्यसपछि आफूलाई ट्याक्सी चाहिएका बेला आफ्नो स्मार्टफोनबाट एप खोल्नुपर्छ ।
एप खुल्नासाथ आफू रहेको स्थान देखाउँछ । र, ट्याक्सीमार्फत आफू कुन गन्तब्यमा पुग्ने हो, त्यसमा क्लीक गर्नुपर्छ । आफू जाने गन्तव्यलाई अक्षरमा टाइप गर्ने सुविधा पनि छ । त्यसपछि अन्भर एपले त्यो गन्तब्यमा पुग्ने सबैभन्दा छोटो रुट जानकारी दिन्छ ।
त्यसपछि सँगै देखिने ‘फाइण्ड ट्याक्सी’ अप्सनमा क्लिक गर्नुपर्छ । यसमा क्लिक गरेपछि तपाईं रहेको क्षेत्र वरपर अन्भरको सेवा दिने गरी दर्ता भएका ट्याक्सी देखाउँछ । ट्याक्सी आफू बसेको क्षेत्रबाट कति परको दूरीमा छ भन्ने पनि एपमै देखिन्छ ।
सबैभन्दा नजिक देखिएको ट्याक्सीलाई तपाईंले सेवाका लागि अनुरोध गर्न सक्नुहुन्छ । तपाईंले आफ्ना केही कुरा भए ट्याक्सी चालकलाई एपमार्फत नै म्यासेज गर्न सक्नुहुन्छ । ट्याक्सीले तपाईंको ‘रिक्वेष्ट’ स्वीकारेपछि तपाईं सेवाको लिनका लागि तयार बन्न सक्नुहुन्छ ।
नेपालीभन्दा विदेशी यात्रुको आकर्षण
अन्भरका संस्थापक खड्का अनुसार यो यो प्रविधिबाट ट्याक्सी बुकिङ सुरु भएको ४ महिना बितेको छ । तर, यसमा नेपाली यात्रुको भन्दा विदेशबाट आएका पर्यटकको बढी चासो देखिएको छ । विदेशमा यस्तो प्रविधि निकै प्रचलनमा छ । धेरै ट्याक्सी कम्पनीहरुले आफ्नै ट्याक्सीलाई यो सिस्टमबाट चलाउँछन् । तर, नेपालमा भने यो प्रविधि बिल्कुलै नयाँ रुपमा आएको छ ।
सेवा विस्तार हुँदै
धेरैजसो स्वरोजगार ट्याक्सी चालकहरुले यसलाई बुझेका पनि छैनन् । त्यसैले अन्भरलाई यसबारे बुझाउनै समस्या परेको छ । यात्रुमा पनि यसप्रति विश्वास जागिसकेको छैन । ‘नेपाली यात्रुभन्दा बढी विदेशी पाहुनाले अन्भरको प्रयोग गरिरहेका छन् । उनीहरु गुगलमा खोजेर पनि यो एप डाउनलोड गरिरहेका छन् र एपमार्फत ट्याक्सी सेवाको बुकिङ गरिरहेका छन्’ खड्का भन्छन् ।
अन्भरमा अब झण्डै थप ४ सय ट्याक्सी जोडिने प्रक्रियामा आइसकेका छन् । २ सय मात्रै ट्याक्सी यसमा आएकाले सेवा विस्तारै प्रभावकारी हुँदै जाने अन्भरको विश्वास छ ।
‘हाम्रो आफ्नै ट्याक्सी नभएकाले चालकले आफूलाई पायक पर्दा मात्रै जीपीएस अन गर्छ । नेपालमा सकेसम्म चालकहरुले अनलाइन बुकिङ लिन चाहेको देखिँदैन’ खड्काले भने,’अब विस्तारै यो प्रविधिमा नगई सुख छैन ।’ अनलाइनखबर

3055
Shares

ट्रेन्डिङ