सबैको समाचार
शनिबार, फाल्गुन १२, २०८०
  • होमपेज
  • म्याग्दीकालीबाट ५०० किलोवाट बिजुली उत्पादन

म्याग्दीकालीबाट ५०० किलोवाट बिजुली उत्पादन

4025
Shares
म्याग्दीकालीबाट ५०० किलोवाट बिजुली उत्पादन

कालीगण्डकी ऊर्जा विकास उपभोक्ता समितिको पहलमा म्याग्दी र कालीगण्डकीको सङ्गमस्थल बेनीको दोभानबाट ५०० किलोवाट क्षमताको बिजुली उत्पादन गरिएको छ ।
बेनी नगरपालिकाको रु ५० हजार आर्थिक सहयोग र उपभोक्ता समितिको रु चार लाख ५० हजार गरी कुल पाँच लाखको लागतमा विद्युत् उत्पादन गरी बेनी बजारका बैंकरोड, सङ्गमचोक, इन्द्रणीटोल, आवारोड, बैंकरोडको भित्री गल्लीलगायतका स्थानमा बिजुली बालिएको समितिका अध्यक्ष ज्ञानेन्द्र श्रेष्ठले जानकारी दिनुभयो ।
उहाँका अनुसार ऊर्जाको क्षेत्रमा लामो समय काम गरी अनुभव बटुल्नु भएका प्राविधिक दुर्गाप्रसाद श्रेष्ठको योजना र प्राविधिक सहयोगमा बिजुली उत्पादन गरिएको हो । प्राविधिक श्रेष्ठले यसअघि पनि कालीगण्डकी नदीबाट व्यक्तिगत लगानीमा बिजुली उत्पादन गर्नुभएको थियो ।
प्राविधिक श्रेष्ठको सीपलाई सदुपयोग गरी आवश्यक लगानीको व्यवस्था गर्नसके म्याग्दी र कालीगण्डकी नदीबाट बेनी बजारलाई आवश्यक पर्ने बिजुली उत्पादन गर्न सकिने कालीगण्डकी ऊर्जा विकास उपभोक्ता समितिका सचिव रुद्रप्रसाद सुवेदीले बताउनुभयो । “यसलाई निरन्तरता दिन सबैले सहयोग गर्नुपर्ने आवश्यकता छ” सचिव सुवेदीले भन्नुभयो ।
“जिल्ला विकास समिति, नगरपालिका, उपभोक्ता समिति, स्थानीयवासीलगायत सम्बन्धित निकाय र सङ्घसंस्थाको पहलमा आवश्यक बजेट व्यवस्था गरी विद्युत् उत्पादन कार्यलाई निरन्तरता दिनुका साथै थप क्षमता विस्तारमा पहल गर्नु आवश्यक देखिएको छ” अध्यक्ष श्रेष्ठले भन्नुभयोे ।
बेनीबजारमा अहिले पनि दैनिक एक घन्टाभन्दा बढी समय विद्युत् भार कटौती हुँदै आएको छ । यो प्रविधि विशेष गरी विद्युत् भार कटौतीको समयमा उपयोगी हुने देखिएको स्थानीयले बताएका छन् । रासस

4025
Shares

ट्रेन्डिङ