परम्परागत पौभाकलामा पाँच दशकदेखि निरन्तर क्रियाशील अग्रज कलाकार ज्ञानकर वज्राचार्यको स्मृतिमा ख्वप पौभा च्वमी पुचः र नेपाल कला परिषद्ले आइतबार संयुक्त रुपमा श्रद्धान्जलि सभा गरे ।
नेपाली परम्परागत पौभा कलामा साधनारत ६२ वर्षीय वज्राचार्यको यही फागुन १३ आफ्नै निवासमा निधन भएको थियो । सभामा ख्वप पौभा च्वमी पुचः भक्तपुरका सचिव पूर्ण ह्योजूले आफूहरुले एक असल अभिभावक गुुमाएको बताउँदै भने, “परम्परागत कलामा देवीदेवतासम्बन्धी चित्र बनाउने विशिष्ट ज्ञान वज्राचार्यमा रहेको र उहाँको निधनसँगै त्यो कला क्षेत्रकै लागि अपूरणीय क्षति पुगेको छ ।”
वज्राचार्यबाट हामीले धेरै कुरा सिक्न बाँकी नै रहेको पौभाका अग्रज कलाकार दीपक जोशीले बताउनुभयो । सभामा पौभा कलाकार मुक्तिसिंह थापा, परिषद्का महासचिव शङ्करनाथ रिमाल र सदस्य शान्तकुमार राई, वरिष्ठ कलाकार किरण मानन्धरले वज्राचार्यका बारेमा चर्चा गर्नुभएको थियो । सो अवसरमा वज्राचार्यका बारेमा टङ्क उप्रेतीद्वमरा निर्देशित २० मिनेटको वृत्तचित्रसमेत देखाइएको थियो ।
भक्तपुरको बिहार तथा बहीमा बनाइएका चित्रबाट प्रभावित भएर उहाँ कला क्षेत्रमा लाग्नुभएको थियो । उहाँले माटाका मूर्ति समेत बनाउनुभएको थियो । उहाँले स्कुल पढ्दा माक्र्स, लेनिन, राजा महेन्द्र, पं नेहरु आदिका चित्र बनाउनुभएको थियो । स्व वज्राचार्यका एक छोरा र श्रीमती छन् । रासस