दक्षिण कोरियाका पूर्व राष्ट्रपति पार्क गेयुन हेले राष्ट्रपतिको लागि सरकारी आवास ‘ब्लु हाउस’ आइतबार छोड्नुभएको छ ।
महाअभियो लगाउने संसद्को निर्णयलाई अदालतले सदर गरेको दुई दिनपछि पदच्युत हुनुभएकी राष्ट्रपति पार्क सरकारी निवास छोडी सोलस्थित आफ्नो निजी निवासमा फर्किनुभएको छ ।
अदालतको आदेशको विषयमा केही पनि प्रतिक्रिया नदिई उहाँ निजी निवास फर्किनु भएको बताइएको छ ।
दक्षिण कोरियाको संवैधानिक अदालतले दक्षिण कोरियाली राष्ट्रपति पार्क गेयुन हेलाई गत शुक्रबार पदमुक्त गरिएको आदेश दिइएको थियो ।
राष्ट्रपति हेलाई पदमुक्त गर्ने फैसला उक्त अदालतको पूर्ण इजलासले सर्वसम्मत रूपमा गरेको थियो । कार्यबाहक प्रधानन्यायाधीश लि जुङमीको इजलासबाट सो फैसला आएको थियो ।
उहाँलाई यसअघि नै दक्षिण कोरियाली संसदले महाअभियोग पनि लगाएको थियो । शुक्रबार नै उक्त अदालतले पदमुक्तिको फैसला सुनाउँदा दक्षिण कोरियाका मुख्य सञ्चारमाध्यमले प्रत्यक्ष प्रसारण गरेका थिए ।
दक्षिण कोरियाको राजनीतिक इतिहासमा अदालतको आदेशबाट पदमुक्त हुने उहाँ कोरियाको एक मात्र राष्ट्रपति हुनुहुन्छ । तर महाअभियोग लाग्ने राष्ट्रपतिहरूमा भने उहाँ दोस्रो हुनुहुन्छ ।
यसअघि सन् २००४ मा तत्कालीन राष्ट्रपति रो मोह्युनलाई पनि निर्वाचनको बेला आफ्नो पार्टीलाई समर्थन गर्न मतदाताहरूलाई आह्वान गरेको आरोपमा महाअभियोगको प्रस्ताव गरिएको थियो ।
तर उहाँलाई पछि भने माफी दिइएको थियो । उहाँको कामबाट निर्वाचन कानुन उलङघन भएको भए पनि महाअभियोग नै लगाउनुपर्ने खालको नभएको फैसला भएको थियो ।
गत वर्षको डिसेम्बर– ९ देखि पार्कलाई महाभियोग लगाउने प्रस्तावमाथि संसद्मा छलफल भएको थियो । राष्ट्रपति पार्कलाई आफ्नो पदको दुरूपयोग गरेको अभियोग लागेपछि राजीनामा माग गरिएको थियो ।
सन् २०१६ को डिसेम्बरमा कोरियाली संसद्ले पार्कविरुद्ध महाभियोग लगाउने प्रस्तावलाई आवश्यक दुई तिहाई मत मार्फत प्रस्तावलाई पास गरेको थियो । रासस÷एएफपी