शिवपुरी राष्ट्रिय निकुञ्जभित्र पर्ने तारेभिर जंगलमा शव गाडिएको अवस्थामा फेला परेकी सुष्मा लामाको हत्या आरोपमा एक युवक पक्राउ परेका छन् । 

पक्राउ पर्नेमा सोहि गाउँका २१ वर्षीय रुपेन्द्र लामा रहेका छन् । काठमाडौं उपत्यका अपराध अनुसन्धान कार्यालयले पत्रकार सम्मेलन गर्दै हत्यामा संलग्न लामालाई सार्वजनिक गरेको छ ।

बुढानिलकण्ठ मा.विमा कक्षा ११ मा अध्ययनरत तारेभिरकै स्थानीय रहेकी सुस्मा गत माघ २२ गते कलेज जान्छु भनेर घरबाट निस्किएकी थिइन् । उनको परिवारले उनी हराएको भन्दै खोजी गरिदिन बौद्ध प्रहरीमा उजुरी दिएका थिए । सोही क्रममा गत फागुन २५ गते प्रहरीले शिवपुरी राष्ट्रिय निकुञ्ज जंगलमा गाडिएको अवस्थामा १८ वर्षीया लामाको शव फेला पारेको थियो ।

उनको शव गाडिएको अवस्थामा जंगलमा गएका स्थानीयले देखेपछि प्रहरीलाई खबर गरेका थिए । लगतै प्रहरीले उनको शव डोरीले बाँधेको अवस्थामा फेला परेको थियो । प्रहरीले उनको हत्या भएको हुन सक्ने आंशकामा अनुसन्धान सुरु गरेको थियो ।

सुष्मा र पक्राउ परेका युवक रुपेन्द्र एकै ठाउँका बासिन्दा हुन् । प्रहरीका अनुसार उनीहरु बाख्रा चराउने, घाँस काट्ने जस्ता घरायसी काममा सँगै जाने गर्थे । टेलिफोन र सामाजिक सञ्जालबाट पनि कुराकानी हुने गरेको थियो ।

छिल्लो आठ महिनायता भने रुपेन्द्रले सुष्मालाई प्रेमिकाको रुपमा हेर्ने गरेको पाइएको प्रहरी अधिकारीहरु बताउँछन् । तर सुष्माले भने रुपेन्द्रसँग प्रेम सम्बन्ध चाहेकी थिइनन्

रुपेन्द्रले सात दिनसम्म सुष्माको गतिविधिको अध्ययन गरेको अनुसन्धानबाट खुलेको छ । सुष्माले पढ्ने बुढानीलकण्ठ मावि जाने बाटो कुरेर बस्ने गरेको, अन्य व्यक्ति देखेकाले सफल नभएको र आठौं दिनमा हत्या गरेर शव गाडेको वयान रुपेन्द्रले प्रहरीसमक्ष दिएका छन् ।

सुष्मा २२ माघमा घरबाट कलेज गएदेखि फर्केकी थिइनन् । २३ माघमा उनको फेसबुक आइडीबाट बेहुला बेहुलीको कपडा लगाएको फोटो पोस्ट भएको थियो । बेहुलाको अनुहारमा इमोजी राखेर छोपिएको थियो भने क्याप्सनमा लेखिएको थियो, ‘सरी सबैजनालाई ३ दिनमा म आउँछु ।’

त्यसको ३ दिनपछि २५ माघमा परिवारका सदस्यले सुष्मा हराएको भन्दै प्रहरीमा निवेदन दिएका थिए ।

सुष्माको शव पहिचान भएपछि प्रहरीले फेसबुकमा पोस्ट भएको फोटोकै आधारमा अनुसन्धान अघि बढाएको थियो । त्यसपछि प्रहरीले सुष्मासँग कुराकानी हुने व्यक्ति र उनका साथीहरुको खोजी गर्दै एक सय जना भन्दा बढीसँग सोधपुछ गरेको थियो । 

पुरै गाउँ नै सर्च गरेपछि रुपेन्द्रलाई घरैबाट पक्राउ गर्न सफल भयौैं । उनैको कोठाबाट सुष्माका कापी किताब समेत बरामद भएपछि झनै सजिलो भयो’, एसएसपी राठौरले भने ।

पक्राउ परेका रुपेन्द्रलाई कर्तव्य ज्यानको कसुरमा अनुसन्धान अघि बढाउन प्रहरी वृत्त बौद्ध पठाइएको उनले जानकारी दिए ।