आइतवार, बैशाख २३, २०८१
बागमती प्रदेश सभामा प्रमुख प्रतिपक्ष दल नेकपा माओवादी केन्द्रका नेता शालिकराम जमरकट्टेलले संसदमा एमालेले दम्भ देखाएकोले ‘गलहत्याउन पर्ने हो ?’ भन्दै प्रश्न गरेका छन् ।
केपी ओली प्रवृत्ति प्रदेश सभामा देखिएको जनाउँदै उनले एमालेले विधि अनुसार नचलेर दादागिरी देखाएको आरोप लगाए । ‘सरकारले विश्वासको मत लिनुपर्ने ठाउँ संसद छोड्ने धम्की दिनु कस्तो हो ?,’ उनले एमालेलाई प्रश्न गरे ।
उनले आगामी प्रदेश सरकारको नेतृत्व नेकपा (एकीकृत समाजवादी) का नेता राजेन्द्र पाण्डेले गर्ने बताए । उनले गठबन्धनबाट मुख्यमन्त्री पाण्डे बन्ने औपचारिक जानकारी संसदलाई गराएका हुन् ।
सभामुखले प्रमुख प्रतिपक्ष दलका नेतालाई बोल्न दिएको समयमा उनले यस्तो बताएका हुन् । उनले नेकपा एमालेका मुख्य सचेतक दिपक निरौलाले प्रदेश सभाको बैठक सार्ने दिएको पत्रबारे चर्को विरोध गरेका छन् । उनले नेकपा एमालेले प्रदेश सभाको अपमान गरेको बताए ।
मुख्यमन्त्रीको राजीनामा माग
बैठकमा बोल्दै जमरकट्टेलले टसल र मुठभेड तर्फ नलगी मुख्यमन्त्री शाक्यले सहज ढंगले राजीनामा दिनुपर्ने बताए । उनले राजीनामा नदिए फेरी जर्बजस्ती प्रदेश प्रमुखकोमा गएर बहुमत पु¥याउनुपर्ने बताए ।
उनले गठबन्धन ख्याल ख्यालमा नबनेको भन्दै केपी ओलीको ध्रुवीकरणको विरुद्धमा र संविधानको पक्षमा बनेको बताए ।
