राष्ट्रिय तथा अन्तर्राष्ट्रिय रुपमा आफ्ना उपस्थित अब्बल बनाएको धुलिखेल नगरपालिकाको भित्री सडकको अवस्था कन्तबिजोक छ ।
नगरपालिका भैकन पनि सबैभन्दा पछि परेको वडाभित्र पर्छ वडा नम्बर ३ । यो वडाको कुत्ताल, नयाँबस्ती, चंखुबेसी जस्ता ठाउँका नागरिक पनि धुलिखेल नगरपालिका स्थानीय बासिन्दाभित्रै पर्छन् ।
तर विकास निर्माण हिसाबले उनीहरु धुलिखेल नगरबासी हो की होइन भन्नेमा दुविधा महशुस गर्छन् । २०७४ सालमा भएको स्थानीय तहको निर्वाचनपछि पक्कै केहि हुन्छ होला भन्ने सोचेका थिए यहाँका नागरिकले । तर उनीहरुको दैनिक भोगाईमा परिवर्तन आउने गरी गतिलो विकास निर्माण भएको छैन् ।
सांसद लक्ष्मण लम्सालको पहलकदमीमा दुइ्र्र पटक बजेट परेर बल्ल तल्ल सडक विस्तार भयो । अहिले बेसीका खेतमा फलेका अन्नबाली घरसम्म ल्याउन किसानलाई निकै सजिलो भएको छ । तर नगरपालिकाको तर्फ यहाँका नागरिकलाई खासै वास्त गरिएको छैन् ।
चखुबेसी, नयाँबस्ती हुँदै पाँचखाल निस्कने सडकको धुलिखेल खण्ड पिच गर्न सांसद लम्सालकै पहलमा बागमती प्रदेश सरकारले १ करोड ५० लाख रुपैयाँ विनियोजन गरेको छ । यो रकममा धुलिखेल नगरपालिकाले पनि १ करोड ५० लाख नै हालेर पिचको काम अघि बढाउनु पर्ने हो ।
नगरप्रमुख अशोक कुमार ब्याञ्जु श्रेष्ठले अरनिको राजमार्ग हुँदै नयाँबस्ती पुग्ने सडकका लागि ३ करोड रुपैयाँ पिचका लागि टेण्डर भैसकेको बताउनुभयो ।
त्यस्तै अरनिको राजमार्गबाट वडा नम्बर २ रविओपी पुग्ने सडकको लागि ५ करोड रुपैयाँ विनियोजन गरे पिचको प्रक्रिया अघि बढेको मेयर ब्याञ्जुले बताउनुभयो । तर यी सडकमा ठेकेदारले काम अझै सुरु गरेको देखिँदैन् ।
पिच होला र ? भन्ने प्रश्न यहाँका नागरिकको मनमा गढेको छ । त्यो भन्दा पहिले यो सडकको खाल्डो देख्न नपाए हुन्थ्यो भन्ने यहाँका धेरै नागरिकको भनाई छ । यो खाल्डो यहाँका स्थानीयलाई दिनुसम्मको हैरानी दिइरहेको छ ।
नगरपालिकाले केहि महिना अघि प्रशोधन केन्द्रमा ढल पुर्याउन खनेको खाल्डोलाई ब्यवस्थापन नगर्दा चंखु बेसी, नयाँबस्तीका नागरिक जोखिमयुक्त यात्रा गर्न बाध्य छन् ।
उनीहरुले ढलको पाइपका लागि खनिएको खाल्डोमा जुनसुकै बेला दुर्घटना हुन सक्ने भन्दै सामाजिक सञ्जाल मार्फत नगरपालिकाको ध्यानाकर्षण गराएका छन् । पिच हुँदै गर्छ । तर खाल्डो मात्रै ब्यवस्थापन गरिदिँए निकै सजिलो हुने स्थानीयको भनाई छ ।