काठमाडौँ, १६ कार्तिक । दोश्रो चरण अन्तर्गत हुने प्रतिनिधिसभा निर्वाचनका लागि प्रमुख दलका शीर्ष नेताले पनि आज उम्मेदवारी दर्ता गराउँदैछन् । नेपाली कंग्रेस सभापति तथा प्रधानमन्त्री शेरबहादुर देउवाले डडेल्धुराबाट उम्मेदवारी दिँदै हुनुहुन्छ । प्रतिनिधिसभामा एउटा मात्रै क्षेत्र रहेको डडेल्धुरामा वारेस नामा मार्फत प्रधानमन्त्री देउवाले उम्मेदवारी दिँदै हुनुहुन्छ ।

आफ्नो कार्य व्यस्तताका कारण प्रधानमन्त्री देउवा गृह जिल्ला जान नसक्ने भएकाले वारेस नामाबाट उम्मेदवारी दर्ता गर्न लागिएको उहाँका प्रेस संयोजक गोविन्द परियारले जानकारी दिनुभयो । कांग्रेस वरिष्ठ नेता रामचन्द्र पौडेलले तनहुँको क्षेत्र नम्बर १ बाट उम्मेदवारी दिँदै हुनुहुन्छ । नेकपा एमालेका अध्यक्ष केपी ओलीले झापा ५, नेता माधव नेपालले काठमाडौं २ र झलनाथ खनालले इलाम १ बाट उम्मेदवारी दिँदै हुनुहुन्छ ।

एमाले नेता सुवास नेम्वाङ्गले इलाम २ बाट मनोनयन दर्ता गराउँदै हुनुहुन्छ । माओवादी हकेन्द्रका अध्यक्ष पुष्पकमल दाहाल पनि मनोनयन दर्ताका लागि चितवन पुग्नु भएको छ । चितवन क्षेत्र नम्बर ३ मा मनोनयन दर्ताका लागी दाहाल हिजो गृह जिल्ला पुग्नुभएको हो । काठमाडौं क्षेत्र नं १ मा कांग्रेस नेता प्रकाशमान सिंह, कृष्ण सिटौलाले झापा ३ बाट र एमाले महासचिव ईश्वर पोखरेल काठमाडौं ५ र माओवादी केन्द्रका कृष्णबहादुर महाराले दाङ २ बाट उम्मेदवारी दर्ता गराउनु हुने भएको छ ।