काभ्रेपलाञ्चोक जिल्लाको सबैभन्दा पुरानो बनेपा नगरपालिकाले पहिलो पटक शाखागत बार्षिक समीक्षा सम्पन्न गरेको छ ।
२०३८ सालमा स्थापना भएको यो नगरपालिकाले पहिलो पटक आज यसरी शाखागत रुपमा आर्थिक वर्ष २०७९/८० को बार्षिक समीक्षा गरेको निकै लामो समय नगरपालिकामा काम गर्नुभएका कानून अधिकृत श्याम कृष्ण त्रिपाठीले बताउनुभयो ।
२०७९ सालमा सम्पन्न स्थानिय तहको निर्वाचनबाट मेयरमा निर्वाचित शान्ति रत्न शाक्य नेतृत्वको बनेपा सरकारले ल्याएको पहिलो बजेटको समीक्षाबाट शाखागत समीक्षाको थालिन गरिएको हो ।
यसरी शाखागत रुपमा पहिलो पटक समीक्षा गर्दा शाखा प्रमुखदेखि कर्मचारीसम्म अचम्मित परेका थिए । अधिकांश शाखा प्रमुखहरुले यसरी पहिलो पटक प्रगती प्रतिवेदन तयार पारेको बताए । आ–आफ्नो शाखाको प्रस्तुतीमा प्रमूख एवं शाखाका प्रतिनिधिले पहिलो पटक भएकाले कतै भुल भए माफि गर्न आग्रह गरे ।
यसअघिका वर्षहरुमा यस प्रकारको बार्षिक समीक्षा हुने गरेका थिएनन् । केही जनप्रतिनिधि र कर्मचारी मात्रै बसेर समीक्षा सकिन्थ्यो । यो पटक भने मेयर शान्तिरत्न शाक्यले नेपाल पत्रकार महासंघ काभ्रे शाखालाई नै आधिकारी रुपमा निमन्त्रण गरेर समीक्षाको नयाँ थिती बासाल्ने प्रयास गर्नुभएको छ ।
मेयर र उपप्रमुखलाई यसरी शाखागत रुपमा बार्षिक समीक्षा गर्दा प्रभावकारी हुन्छ भनेर उपाय दिने ब्यक्ति हुन् प्रमुख प्रशासकीय अधिकृत भोला प्रसाद चापागाई । चापागाईको यो उपाय यतिबेला नगरपालिकामा नयाँ थिती बनासल्ने आधार बनेको छ । चापागाईले नै नयाँ थिती बसाल्न महत्वपूर्ण भूमिका निर्वाह गर्नुभयो ।
‘मैले निर्वाचित भएर आएपछि सबै शाखाका प्रमुखहरुलाई तपाईहरुको प्रगति विवरण दिनुहोस् भनेको थिएँ । तर उहाँहरुले मानिरहनुभएको थिएन । म निर्वाचित भएर आएपछि यसअघि दुई जना प्रमुख प्रशासकीय अधिकृतसँग काम गरेँ । तर उहाँहरुले यसरी शाखागत प्रगति कहिल्यै खोज्नु भएन् ।’ मेयर शाक्यले भन्नुभयो ।
मेयर शाक्यले नगरपालिकाको आमुल सुधारका लागि नीतीगत रुपमा गर्नुपर्ने सबै खालका काम गर्न कुनै कसर बाँकी नराख्ने प्रतिबद्धता जनाउनुभयो । ‘हामी काभ्रे जिल्लाको पहिलो नगरपालिका हौँ ।
हामीले धेरै कुरा गर्नु छ । हामीलाई एउटा कुशल प्रशासक चालिएको थियो । अहिलेको प्रमुख प्रशासकीय अधिकृतबाट सुधारको सुरुवात भएको छ । नीतिगत रुपमा हामीले गर्नुपर्ने के–के हुन्, गर्न तयार छौँ । नगरपालिका सधै पहिलेकै जसरी चल्न सक्दैन । चल्न दिनु हुँदैन । किन भने हामी नयाँ ब्यक्ति आएका छौँ ।’ मेयर शाक्यको भनाई थियो ।
उपप्रमुख बिमला सापकोटा दाहालले नगरपालिकाले राम्रो काम गर्दा सबै नागरिकको शिर उच्च हुने भन्दै नगरपालिकाको समग्र विकासका लागि गरिने सबै प्रकारका गतिविधिमा साथ र सहयोग रहने बताउनुभयो ।
‘अहिले हामी नगरपालिकाको जिम्मेवार ठाउँमा छौँ । नगरबासीमा हामीले गर्ने सबै निर्णयको असर पर्छ । त्यसैले राम्रो कामका लागि गरिने सबै निर्णयहरुमा एकले अर्कोलाई साथ, सहयोग र समर्थन गर्दै अघि बढ्नुपर्छ । हामीले धेरै कुरा सुधार गर्न आवश्यक छ । साढे एक वर्ष बितिसक्यो, काम गर्ने दौरानमा कता के नमिले जस्तो आभाष भैरहेको छ ।’ उपप्रमुख सापकोटाले भन्नुभयो ।
प्रमुख प्रशासकीय अधिकृत चापागाईले कार्यक्रममा समस्या र समाधानका खाका प्रस्तुत गर्नुभएको थियो । उहाँका अनुसार आज प्रस्तुत गरिएको शाखागत वार्षिक समीक्षाको एकीकृत प्रगति प्रतिवेदन सहित यही ३० गते सार्वजनिक सुनुवाईको आयोजना गरिनेछ ।
त्यो दिन नगरपालिकाको एकीकृत प्रगति प्रतिवेदन प्रस्तुत हुनेछ । ‘बढी भन्दा बढी नगरबासीको सहभागितामा हामी सार्वजनिक सुनुवाई गर्छौ । नगरबासीको सुझाव सुन्छौँ । कार्यान्वयनका लागि गर्नुपर्ने काम थालनी गर्छौँ ।’ प्रमुख प्रशासकीय अधिकृत चापागाईको भनाई छ ।
वडा नम्बर १४ का वडा अध्यक्ष राम बहादुर कुँवरले बार्षिक समीक्षा अहिलेसम्म आफुले नसुनेको बताउनुभयो । ‘थुप्रै कार्यकारी प्रमुख फेरिएपनि यस्तो समिक्षा भएन । म दोस्रो कार्यकालका लागि निर्वाचित भएको हुँ । अहिलेसम्म यो खालको समीक्षा भएको जानकारीमा छैन् । अब चाहिँ सुधारको केही आशा पलाएको छ ।’ वडा अध्यक्ष कुँवरले भन्नुभयो ।
विषय गत समितिको बैठक समेत बजेट बन्नु भन्दा अघि मात्रै बस्ने गरेको वडा अध्यक्ष कुँवरको भनाई छ । उहाँले नगरपालिकाका शाखामा ब्यापक ढिला सुस्ती हुने गरेको भन्दै त्यसलाई तत्काल सुधार गर्न सुझाव दिनुभयो ।
बनेपा नगरपालिकाले आर्थिक वर्ष २०७९/८० मा ५२ प्रतिशत मात्रै खर्च भएको छ । आगामी वर्ष पूँजीगत खर्चलाई बढाउन आवश्वक रणनीति र कार्यतालिका सहित काम गर्ने प्रमुख प्रशासकीय अधिकृत चापागाईले बताउनुभयो ।