पर्वतको कुश्मा नगरपालिकाका सामुदायिक विद्यालयमा अध्ययनरत छात्रालाई निःशुल्क वितरण गर्ने भनी खरिद गरिएको स्यानिटरी प्याडमा आर्थिक चलखेल भएको आशंका गरिएको छ । आर्थिक अनियमित्ताका कारण खरिद गरिएको स्यानिटरी प्याडको भुक्तानी रकम रोकिएपछि वितरण गरिएको छैन ।
सप्लायर्स कम्पनीले सम्झौता बमोजिमको खरिद सामग्री उपलब्ध गराउनेक्रममा नियमित प्रक्रिया पूरा नगरी शिक्षा अधिकृत विष्णुप्रसाद तिवारीसँग मात्र सम्पर्क गरी स्यानेटरी प्याड बुझाएको थियो । खरिद भुक्तानी रकम माग गर्ने कम्पनीले नगरपालिका कार्यालयको खरिद इकाई, जिन्सी शाखा, शिक्षा शाखाका अन्य कर्मचारी, कार्यालय प्रमुखलगायत कसैसँग समन्वय गरेको थिएन ।
नेपाल सरकारको शसर्त अनुदानअन्तर्गत आर्थिक वर्ष २०७९–८० को स्वीकृत कार्यक्रमअनुसार स्यानिटरी प्याड खरिदका लागि विराटनगरको जसमिन हाइजिङ प्रोडक्ट प्रालिसँग सम्झौता भएको थियो । सम्झौताअनुसार सेनिटरी प्याडको लम्वाइ २८० मिमि हुनुपर्नेमा भण्डार गरिएको प्याडको लम्वाई २३० मिमि मात्रै रहेको र एउटा प्याडभित्र ८ पिस हुनुपर्नेमा ६ पिस मात्र भएको पाइएको छ । भण्डारमा पाइएको स्यानिटरी प्याड सम्झौता संख्याभन्दा धेरै कम जम्मा १६ हजार ६ सय ७५ रहेको छ ।
स्यानिटरी प्याड खरिदमा आर्थिक चलखेल गर्ने शिक्षा अधिकृत तिवारीलाई मेयर रामचन्द्र जोशीको विशेष सक्रियतामा अहिले कार्यकारी प्रशासकको जिम्मेवारी दिइएको छ ।