वि.सं २०६० सालदेखि कलाकारीता सुरु गरेका दया एक्टर स्टुडियोका विद्यार्थी हुन् । अनेकौँ संघर्ष गर्दै कलाकारीतामा होमिएका उनी नाटक लेखक तथा निर्देशक, टेलिफिल्मका कलाकार हुँदै अनागरिक चलचित्रबाट नायक बने । लुटमा गोफ्ले बनेर बैंक फोरेका दया, चलचित्र कबड्डीमा काजी बनेर असफल प्रेमीको नमुनाका रुपमा प्रस्तुत भए । हेर्दा सोझो देखिने उनी पर्दामा हिट नायिकाको प्रेममा थुप्रै पटक परिसकेका छन् । उनको वास्तविक प्रेम सम्बन्ध चलचित्रमा देखाइने रोमान्टिक प्रेमभन्दा कम छैन ।
दयाहाङ राईले गायिका बेनुका राईसँग प्रेम गरे । उनी सँगै विवाह गरे । उनीहरुको प्रेमबाट जन्मीएका साम्दुङ विद्यालय जान थालीसकेका छन् । वास्तवीक जीवनको प्रेम कथा सम्झीन, दयाहाङ वि.सं २०५९ सालको सेरोफेरोमा पुग्छन् । खोटाङकी बेनुका गायिका बन्न संघर्ष गर्दै थिइन् । भोजपुरका दयाहाङ रंगक्षेत्रमा राज गर्ने सपना पुरा गर्ने शिलशिलामा थिए । संघर्ष गर्न राजधानी छिरेका बेनुका र दयाको पहिलो भेट रत्नपार्कमा भएको थियो ।
बेनुका गीत रेकर्ड गर्ने तयारीमा थिइन् । रत्नपार्कबाट अनामनगरको दोभान स्टुडियो पुग्नु थियो । साथीहरु पनि सँगै थिए । त्यहि समूहमा थिए, दया । बानेश्वर बस्ने भएकाले उनी पनि बेनुकासँगै पाइला लम्काउँदै थिए । एक अर्काबीच राम्रै परिचय भयो । जिल्ला फरक भएपनि दुबैजना पूर्वकै राई भएकाले निकटता बढ्यो । यसलाई अहिले उनीहरु एउटा अनौठो संयोग मान्छन् । मायाप्रीति विजारोपण भएको पहिलो विन्दु ठान्छन् ।
विस्तारै बेनुकाले दयाको मन तानीन् । दयाले बेनुकामा आफ्नो मान्छे बनाउन लायक गुण देख्न थाले । त्यसैले गायिका बन्नका लागि उनले बेनुकालाई सकेको सहयोग गरे । त्यतिमात्र होइन उनले केहि गीत बेनुकाकै लागि लेखेका पनि छन् ।
उनीहरुको सम्बन्ध साथीबाट विकास हुँदै प्रेममा परिणत हुन केहि समय प्रतिक्षा गर्नु पर्यो । भेटघाट भएको हप्ता, महिना हुँदै वर्ष नै बित्यो । दयाले बेनुकालाई प्रस्ताव राख्ने निधो गरे । बेनुकासँग भेट भयो । छुट्टीने समय पनि आयो । तर, उनको मुटु डरले धक्क फुल्यो । कोठा जानका लागि गाडि चढ्ने तयारीमा थिइन्, बेनुका । दयाले साहस बटुले । अनी भने, “बेनुका म तिमीलाई धोका दिँदैछु ।”
दयाको कुराले बेनुका तर्सीइन् । किनकी उनले पनि दयाका लागि माया साँचेर राखेकी थिइन् । एउटा वाक्य बोलेका दयाले आफ्नो कुरालाई निरन्तरता दिए र भने “तिमीले मलाई राम्रो साथी सम्झेकी थियौ होला तर, मैले यो सम्बन्धलाई साथीभन्दा धेरै माथि, जीवनसाथीको रुपमा सोच्न थाले छु । जुन तिम्रो लागि धोका हुन सक्छ”
दयाले यसो भन्दै गर्दा बेनुकाको मुहारमा चमक आयो । मन खुशिले भरियो । किनकी यस्तै प्रस्तावको प्रतिक्षामा थिइन्, बेनुका । मन परेको मान्छेको हरेक कुरा राम्रा लाग्छन्, त्यसैले उनलाई दयाको प्रेम प्रस्ताव गर्ने शैली साह्रै सिर्जनशील लाग्यो । यद्यपी, उनले भनिन्“जीवन सँगै बिताउने कुराको निर्णय लिन एकदुई दिन समय चाहिन्छ ।”
बेनुकाले मागेको दुई दिनको समय दयालाई निकै लामो झैँ लागेको थियो । समय ढिलो चलेजस्तो महसुस भइरहेको थियो । तर पनि मनको कुरा भन्न सफल भएकोमा उनी आनन्दीत थिए । र मनको कुनै कुनमा प्रस्ताव अस्वीकार हुने पो हो कि भन्ने थोरै डरले डेरा जमायो ।
निर्णयका लागि दुई दिन मागेकी बेनुकासँग दयको भोलीपल्टै भेट भयो । बेनुकाले मनको कुरा खोलीन् । आफु सोहि प्रस्तावको प्रतिक्षामा रहेको बताइन् । बेनुकाको स्वीकारोक्तीले दया ढुक्क भए । सम्बन्ध झन् कसीलो भयो । साथ दह्रीलो भयो । ६ वर्षसम्म उनीहरु प्रेममा रमाए । त्यसपछि विवाहको आवश्यकता महसुस गरे । वि.सं २०६५ सालमा दया र बेनुकाको प्रेम सम्बन्ध विवाहमा परिणत भयो ।
स्रोत : टेलिभिजन कार्यक्रम जीवनसाथी