काभ्रे : नेपाली काँग्रेस जिल्ला सभापतिमा उम्मेरदवारी घोषणा गरेका तीर्थ लामाले केहि दिनमै फेरी गुट फेरेका छन् । केहि दिन अघि लामाले नेपाली काँग्रेसको १४ औँ महाधिवेशनमा जिल्ला सभापतिको उम्मेदवार घोषणा गरेसँगै काभ्रे कांग्रेसभित्रको गुट तितरवितर भएको थियो ।

स्रोतका अनुसार आज केन्द्रिय सभापति शेर बहादुर देउवाको निजी निवास बुढानिलकण्ठमा भएको तीर्थ लामा र शिव हुमागाई बीचको वान टु वान कुराकानीपछि लामा फेरी हुमागाईँ गुटमै फर्किएका हुन् ।

लामाले सभापतिको उम्मेरदवारी घोषणा गरेपछि पुनः जिल्ला सभापति बन्ने दाउमा रहेका पूर्व जिल्ला सभापति शिव हुमागाईँ र तीर्थ लामाबिच फाटो आएको थियो । उक्त समयमा लामालाई वर्तमान जिल्ला सभापति मधु आचार्यले साथ दिएका थिए ।

हुमागाईँसंग लगभग पानी बाराबारकै अवस्थामा पुगेका तीर्थ लामा भने आजबाट पुनः हुमागाईँ गुटमा फर्किएका छन् । हुमागाईँ आफू जिल्ला सभापतिमा नउठ्ने र लामालाई जिल्ला सभापतिमा उम्मेरदवार बन्न दिने सहमती भएपछि उनी फेरी हुमागाईँ गुटमै फर्किएका हुन्

। लामा संविधानसभा सदस्य तथा प्रतिनिधि सभा क्षेत्र नं १ काभ्रेका सभापति समेत हुन् । दुईदिन अघि मात्रै लामाले जिल्ला सभापति आचार्य, उपसभापति अच्युत पौडेल,गणेश लामा,कञ्चनचन्द्र बादे लगायतसंगै काँग्रेसको बनेपा सम्र्पक कार्यालयको उद्घाटन गरेसंगै पूर्वसभापति हुमागाईँ लगभग एक्लिएका थिए ।

यस अघि सभापति मधु आचार्य गुटमा रहेका शक्तिशली नेताहरुले सभापतिका लागि तीर्थ लामालाई साथ दिने सहमति गरेको स्रोतले दाबी गरेको थियो । हुमागाईँले साथ नदिने बुझिएपछि गणेश लामा, तीर्थ पसखल, कञ्चन चन्द्र बादे र महेश खरेल लगायत जिल्लाका शीर्षस्थ नेताहरुलाई भेट्न तीर्थ लामा रातारात होटलमा पुगेर छलफललाई तिव्रता दिएका थिए ।

उनीहरुबीच चौपक्षीय सहमति पनि भएको थियो । तर लामा गणेश लामा सहितका नेताहरुलाई धो का दिएर फेरी हुमागाईँ गुटमा गएका हुन् ।