काभ्रेका स्थानीय तहले कोभिड १९ बाट जोगिन पुनः आफ्ना नागरिकलाई आग्रह गरेका छन । नमोबुद्ध नगरपालिका र धुलिखेल नगरपालिकामा कोभिडका बिरामी देखिएसंगै अन्य स्थानीय तहले पनि कोभिड सचेतनाको घण्टी बनाउन थालेका हुन् ।
काभ्रेका विभिन्न स्थानीय तहले आफ्ना नागरिकलाई सचेत गराउँदै कोभिडबाट बच्न यसअघि अपनाइएका स्वास्थ्य सुरक्षा मापदण्डका उपाय अललम्बन गर्न आफ्ना नागरिकलाई आग्रह गरेका छन् ।
नमोबुद्ध, धुलिखेल र पनौती नगरपालिकाले सूचना नै जारी गरेर आफ्ना नागरिकलाई सजग गराइसकेका छन । सामाजिक दूरी कायम गर्न, अनिवार्य मास्कको प्रयोग गर्न, ठूला भिडभाडमा नजान र समय समयमा साबुन पानीले मिचिमिति हातधुन स्थानीय तहले भनेका छन् ।
झाडापखाला लागे, ज्वरो आए र रुघाखोकीको लक्षण देखिए तत्काल आफु बसेको ठाउँ नजिक रहेका स्वास्थ्य संस्थामा सम्पर्क गर्न पनि स्थानीय तहहरुले अनुरोध गरेका छन । स्वास्थ्य कार्यालय काभ्रेका अनुसार जिल्लामा आज १७ जनाको कोभिड परीक्षण गरिएको थियो ।
जिल्लामा आज एक जनामा पनि कोभिड नदेखिएको स्वास्थ्य कार्यालय काभ्रेका प्रमुख डाक्टर पुरुषोत्तम राज सेढाईले जानकारी दिनुभयो । हालसम्म जिल्लामा सक्रिय संक्रमितको संख्या १८ जना रहेको छ ।
त्यसमा ९ जना विदेशी मुलका नागरिक रहेका छन । बाँकी धुलिखेल नगरपालिकाका ८ जना र नमोबुद्ध नगरपालिकाका १ जना छन । ९ जना संक्रमित आफ्नै घरमा आइसोलेसनमा रहेका छन ।