सोमवार, बैशाख १७, २०८१
चितवन । यही फागुन १२ गते कक्षा ८ मा अध्ययनरत शालिन पोखरेल चितवनको रत्ननगर नगरपालिका वडा नं. १० मा रहेको शिशु निकेतन माविको छात्रावासमा मृत अवस्थामा भेटिइन् ।
घटना भएको थाहा पाउनेवित्तिकै इलाका प्रहरी कार्यालय टाँडीको टोली घटनास्थल पुगेको थियो । होस्टेल भित्रको कोठामा स्काउटको डोरीले घाँटीमा पासो लगाएर झुण्डिएको अवस्थामा फागुन १२ गते शालिन भेटिएकि थिईन् ।
परिवारका सदस्यले होस्टल भित्रै उनीमाथि बलात्कारपछि हत्या गरिएको दावी गरेका छन् । जिल्ला प्रहरी कार्यालय चितवनका अनुसन्धान अधिकृतहरुले भने प्रारम्भिक अनुसन्धानमा बालिकाले आत्महत्या गरेको तर्फ संकेत गरेका छन् ।शवको प्रारम्भिक विवरणअनुसार उनको गालानेर डाम छ । घाँटीमा डोरीको डाम छ । प्रहरीले प्रारम्भिक अनुसन्धानमा शरीरका अन्य भागमा कुनै बाहिरी चोटपटक नभेटेको बताएको छ ।
विगत दुई वर्षदेखि विद्यालयको होस्टलमा बस्दै आएकी शालिनले आत्महत्या गरेकी हुन् वा हत्या गरिएको हो भन्ने विषयको अनुसन्धान प्रहरीले गरिरहेको जनाएको छ ।
शालिनको बुबा दक्षिण अफ्रिकामा र आमा दुवईमा बस्दै आएका थिए । बुवा केही समय अगाडि मात्रै नेपाल आएका हुन् । बुवा र आमा दुवैले विदेशमा अर्को विवाह गरेर बसेका थिए । आमाले पाकिस्तानी नागरिकसँग बिहे गरेकी थिइन् भने बुवा काठमाडौं बसुन्धरामा कान्छी श्रीमतीका साथ बसिरहेका छन् ।
शालिन तीन वर्षको छँदा नै उनका आमा र बुवाको सम्बन्ध बिच्छेद भएको थियो । आमा-बुवा बीच सम्वन्ध बिच्छेद भएपछि उनी कहिले काकासँग त कहिले मामाघरकी हजुरआमासँग बस्दै आएकी थिइन् ।
उनीहरुले होस्टेलको वार्डेनमार्फत बेलाबखत छोरीसँग फोनमा कुराकानी गर्ने गरेका थिए । लामो समयदेखि बुवा–आमाको ममताबाट टाढिएकी थिइन् शालिन । घटनापछि भने उनका बुवा–आमा दुबै मिलेर पत्रकार सम्मेलन गरेका छन् ।
