काभ्रे : स्थानीय तहको निर्वाचन हुन २४ दिनमात्रै बाँकी छ । स्थानीय तहको निर्वाचन नजिकिएसँगै काभ्रेका जनप्रतिनिधिहरुले उपयोग गरिरहेका सवारीसाधन फिर्ता गर्न थालेका छन् ।
जिल्लाका अन्य स्थानीय तहका जनप्रतिनिधिले सवारीसाधन फिर्ता नगरे पनि शुरुआत भने भएको छ । काभ्रे जिल्लाको पनौती नगरपालिकाका सम्पूर्ण जनप्रतिनिधिले कुनैपनि सरकारी सेवा नलिने भएका हुन् ।
आज बसेको कार्यपालिका बैठकले उक्त निर्णय गरेको हो । नगरपालिका प्रमुख,उपप्रमुख, वडा अध्यक्ष र वडा सदस्य लगायत पालिकाका सम्पूर्ण जनप्रतिनिधले सरकारी सेवा सुविधा नलिने भएका हुन् ।
नगर प्रमुख भीम न्यौपाने र उपप्रमुख गीता बञ्जाराले सरकारी गाडीको साँचो समेत प्रमुख प्रशासकिय अधिकृत प्रदिप पाैडेललाई आजै बुझाइसकेका छन् । यो निर्णय भोलिबाट लागू हुने नगर प्रमुख भिम न्यौपानेले सबैको समाचारलाई जानकारी दिए । सेवा सुविधा छोडे पनि काममा भने निरन्तरता दिने नगर प्रमुख न्यौपानेले जानकारी दिए ।
न्यौपानेले फरक प्रसंगमा पार्टीले फेरी आफूलाईनै नगर प्रमुखको रुपमा अगाडी सार्ने बताए । एमालेबाट नगरप्रमुख बनेका उनले पार्टीले सहि निर्णय लिनेमा आफू विश्वस्त रहेको बताए ।
राजनीतिक दल, निर्वाचन केन्द्रित प्रचारप्रसारमा संलग्न हुनुपर्ने भएकाले पनि स्थानीय तहका जनप्रतिनिधिहरुले सवारी फिर्ता गर्न थालेका हुन् ।
निर्वाचन आयोगले पनि निर्वाचन केन्द्रित कार्यमा सरकारी सवारी प्रयोग नगर्न अनुरोध गरेएको थियो । वैशाख ११, १२ गतेसम्म उम्मेदवारी मनोनयन गर्ने समय भएकाले केही जनप्रतिनिधिले भने उपयोग गरिरहेको सवारी फिर्ता गरेका छैनन् ।