सोमवार, बैशाख १७, २०८१
धुलिखेल नगरपालिकाले वडा नम्बर ८ मा सडक मापदण्ड विपरित बनेका संरचना हटाएको छ ।
नगरपालिकाका प्रमुख प्रशासकीय अधिकृत सुरेन्द्र थापा मगरले जेठ १८ गते नै पिपल बोटदेखि भट्टेडाँडा सडक अन्तर्गत पर्ने द्धारिका होटलले मापदण्डभित्र पर्ने गरी निर्माण गरेका सबै संरचना हटाउन ७ दिने अल्टिमेटम सहितको सूचना जारी गर्नुभएको थियो । तर उक्त सूचना कार्यान्वयनमा ढिलाई भएपछि नगरपालिकाले डोजर चलाइएको हो ।
वडा अध्यक्ष विनोद गौतम, नगरप्रहरी तथा स्थानीयको उपस्थितिमा पिपल बोटदेखि भट्टेडाँडासम्म सडक मापदण्डभित्र पर्ने संचना हटाइएको हो । सडकको मापदण्डभित्र परेको संरचना हटाउन ढिलाई हुँदा सडक विस्तारको काम समेत रोकिएको थियो ।
संघीय समानिकरण अन्तर्गत नगरपालिकाको समेत आधा लगानी रहेको यो सडक निर्माणको काम संरचना नहाउँदा रोकिएको थियो । सडकमा झण्डै ३ करोड ७५ लाख बराबरको ठेक्का लागेको छ । सिंचाई डिभिजन, द्धारिका होटलदेखि सडक मापदण्डभित्र परेका सबै संरचना हटाइएको वडा अध्यक्ष गौतमले जानकारी दिनुभयो ।
‘यो एक वर्षअघिदेखिको प्रयास हो । धेरै पटक सूचना जारी गर्यौ । तर सम्बन्धित धनीले कुनै चासो दिएनन् । बजेट नै फिर्ता जाने अवस्था आइसक्यो । विस्तार भएका ठाउँमा सडक हिलाम्मे र धुलाम्मे भइरहेका छन् । घरधनीले अटेर गरेपछि हामीले डोजर लगाएका हौँ । नाप जाँच गरेर कोहीको धेरै, कोहीको थोरै भन्ने छैन् । सम्मान हिसाबले मापदण्डभित्रका संरचना हटाएका छाँै । अब सडकको थप काम अघि बढ्छ ।’ वडा अध्यक्ष गौतमले भन्नुभयो ।
सारथी होटलदेखि भट्टेडाँडासम्म सडक पिच हुनेछ । पक्की ड्रेन सहितको सडक निर्माणका लागि ठेक्का भएको हो । सडक विस्तारको काम पूरा नहुँदा यात्रुले निकै सास्ती खेल्दै आइरहेका छन् ।
