सोमवार, बैशाख १७, २०८१
काभ्रेपलाञ्चोक जिल्लाको अति विकट खानी खोला गाउँपालिका वडा नम्बर ५ स्यार्ते जन्तेका स्थानीयले सडकको ट्याक खोल्ने डोजर अपरेटरलाई पैसाको माला लगाएर सम्मान गरेका छन् ।
स्यार्ते जन्तेको ट्याक खोलेको खुशीयलीमा स्थानीयले डोजर अपरेटरलाई पैसाको माला लगाएर सम्मान गरेका हुन् । यो सडक खानीखोला करिडोर अन्तर्गतको हो । यो करिडोर अन्तर्गत सडकको कुल लम्बाई २१ किलो मिटर रहेको छ । अब जम्मा ४/५ किलो मिटर मात्रै ट्याक खोल्न बाँकी रहेको पालिका अध्यक्ष इन्द्र बहादुर थिङ छिन्ताङले जानकारी दिनुभयो ।
जसमा १ किलो मिटर स्यार्ते जन्तेमा निकै अप्ठ्यारो क्षेत्र थियो । सोही अप्ठ्यारो क्षेत्रमा ट्याक खोलेबाट स्थानीयले अपरेटरलाई माला लगाएर सम्मान गरेका हुन् । ‘ जुन पैसाको माला लगाएको फोटो सार्वजनिक भयो ।
त्यो त्यहाँका स्थानीयले खुशियाली स्वरुप गरेको सम्मान हो । खानीखोला करिडोर अन्तर्गत त्यो निकै अप्ठ्यारो भूभाग थियो । त्यही भूभागमा ट्याक खोलिएको हो । जम्मा जम्मी १ किलो मिटरको ट्याक होला । तर निकै अप्ठ्यारो ठाउँ थियो ।’ पालिका अध्यक्ष छिन्ताङले भन्नुभयो ।
यो प्रदेश सरकारको बजेटबाट खनिएको सडक हो । करिडोर निर्माण पश्चात वडा नम्बर १, २, ५ र ६ का स्थानीयलाई सहज हुनेछ । अप्ठ्यारो क्षेत्रमा ट्याक खुलेसंगै अन्य भागमा सडक विस्तार गर्न सजिलो हुने भएको छ ।
स्थानीयसंग ट्याक खुलेको खुशी साट्न गाउँपालिका अध्यक्ष छिन्ताङ, १ नम्बरका वडा अध्यक्ष सन्तमान थिङ, ३ नम्बरका वडा अध्यक्ष सागर लामा, ५ नम्बरका वडा अध्यक्ष बुद्धि बहादुर स्याङ्तान र ६ नम्बरको वडा अध्यक्ष बृहस्पति घिसिङ पुग्नुभएको थियो ।
