शनिबार, बैशाख १५, २०८१
काभ्रेपलाञ्चोक जिल्लाको सबैभन्दा कान्छो मण्डनदेउपुर नगरपालिकाले आफ्नो नयाँ भवनबाट सेवा शुभारम्भ गरेको छ । ९ औँ संविधान दिवसको अवसर पारेर नवनिर्मित भवनबाट सेवा शुभारम्भ गरिएको नगरप्रमुख टोक बहादुर वाईबाले जानकारी दिनुभयो ।
२०७२ सालमा संविधान जारी पश्चात भएको राज्य पुनःसंरचनामा साविकको तीन देउपुर (बालुपाटी देउपुर, नयाँगाउँ देउपुर र गौरीबिसौना देउपुर) तथा चार मण्डन (चण्डेनी मण्डन, महादेवस्थान मण्डन, जैसीथोक मण्डन र ज्याम्दी मण्डन) मिलेर २०७३ साल फागुन २७ गते घोषित यो नगरपालिका काभ्रेपलाञ्चोक जिल्लाका ६ मध्ये सबैभन्दा कान्छो नगरपालिका हो ।
नगरपालिका घोषणा भएदेखि २०७४ सालमा सम्पन्न स्थानीय तहको पहिलो निर्वाचनबाट निर्वाचित जनप्रतिनिधि आएको करिब १ वर्षसम्म नगरपालिका कुन्ताबेसी स्थित साविक महादेवस्थान गाविसको कार्यालयबाट (हाल वडा नम्बर ७) सञ्चालन भएको थियो । उक्त भवनबाट सबै शाखा सञ्चालन गर्न ठाउँ अभाव भएपछि नीजि घर भाडामा लिएर नगरपालिकाले दैनिक प्रशासनिक सेवा प्रदान गर्दै आइरहेको थियो । ठाउँ अभाव हुँदा नगरपालिकाको विभिन्न शाखा समेत भाडाकै घरबाट सञ्चालन हुँदै आएको थियो ।
तर अब भने नगरपालिकाका सबै शाखा एउटै भवनबाट सञ्चालनमा आउने नगरप्रमुख वाईबाले बताउनुभयो । ‘लामो समय भाडाको घरबाट हामीले दिँदै आएको सेवा अब आफ्नै भवनबाट प्रदान गर्ने छाँै । हामीले संविधान दिवसको अवसर पारेर विधिवत रुपमा यस नगरपालिकाको नवनिर्मित प्रमुख प्रशासनिक भवनबाट सेवा शुभारम्भ गरेका छौँ । यो एउटै भवनबाट सम्पूर्ण शाखाहरु सञ्चालन हुनेछ । भौतिक पूर्वाधारका हिसाबले हामी मालपोत र नापी कार्यालय समेत यही भवनबाट सञ्चालन गर्ने क्षमता राख्दछाँै ।’ नगरप्रमुख वाईबाले भन्नुभयो ।
नगरपालिकाको नवनिर्मित भवन अपांगता मैत्री रहेको छ । नगरपालिका परिसरभित्र सहजै रुपमा ह्वीलचियर जान सक्ने ब्यवस्था छ । लिफ्टको समेत ब्यवस्था रहेकाले अपांगता भएका सेवाग्राहीलाई समेत सहज हुने नगरपालिकाले जनाएको छ ।
नवनिर्मित भवनबाट सेवा शुभारम्भ कार्यक्रममा बोल्दै उपप्रमुख विष्णुमणि नेपालले सबैको साथ र सहयोगले भवन सुविधा युक्त बनेको बताउनुभयो । उहाँले विकासका अन्य योजनाहरुलाई समेत थाती राखेर एउटै भवनबाट नगरबासीलाई सेवा प्रदान गर्ने हिसाबले नयाँ भवन निर्माण गरिएको बताउनुभयो ।
प्रमुख प्रशासकीय अधिकृत मान बहादुर खड्काले नयाँ भवनबाट नागरिकका लागि नयाँ उत्साह र योजनाका साथ सेवा प्रवाह गर्नुपर्नेमा जोड दिनुभयो । स्थानीय सरकार जनताको नजिकको सरकार भएकाले यसलाई नागरिकका लागि सहज सेवा प्रदान गर्ने थलोको रुपमा विकास गर्नुपर्ने उहाँको भनाई थियो ।
वडा नम्बर ७ को मनमतिडाँडा स्थित करिब ३३ रोपनी जग्गा नगरपालिकाले खरिद गरेर नयाँ भवन निर्माण गरेको हो । बीकेओआई जयमाता जेभीले भवन निर्माणको काम गरेको थियो । २०७७ साल पुस १० गते सम्झौता भएको थियो । २०७९ साल पुस महिनामा भवन निर्माणको काम सक्ने सम्झौता भएपनि कोभिडका कारण भवन निर्माणको काममा केही ढिलाइ भएको हो । जुन भवनमा ६२ वटा कोठा रहेका छन् । २०२ जना क्षमताको कन्फरेन्स निर्माणधिन रहेको नगरपालिकाका सब ईन्जिनियर एवं भवनका प्राविधिक संयोजक सुदर्शन कुमार साहले जानकारी दिनुभयो ।
यो भवनको शुरुको लागत ईष्टामिट २१ करोड ८० लाख ८६ हजार २९० रुपैयाँ थियो । त्यसमा १४ करोड २२ लाख ९४ हजार ९४२ रुपैयाँमा ठेक्का सम्झौता भएको थियो । पछि भिओ गर्दा २३ करोड ८६ लाख ८१ हजार ७९० रुपैयाँ पुग्दा सम्झौता रकम पनि बढेर १५ करोड ४९ लाख ९९ हजार ७२ रुपैयाँ भएको थियो ।
