भूकम्पका कारण भत्किएको संरचनालाई पुननिर्माण गर्न दाङसिङ गाविसका कालीगढलाई भूकम्पप्रतिरोधी घर निर्माणसम्बन्धी तालिम दिइएको छ ।
भूकम्पका कारण क्षति भएको निजी आवास पुनःनिर्माणलाई तीव्र रुपमा अघि बढाउने उद्देश्यले सिकर्मी तथा डकर्मीलाई सातदिने भूकम्पप्रतिरोधी भवन निर्माणसम्बन्धी विशेष तालिम दिइएको हो ।
तालिममा दाङसिङ गाविसका २५ कालीगढको सहभागिता थियो । सेभ द चिल्डेनको सहयोगमा सामुदायिक विकास केन्द्र नेपालले तालिम सञ्चालन गरेको हो ।
गाउँमा निर्माण हुने घरको माटो परीक्षणदेखि सुरक्षित घर निर्माणका लागि तालिमले महत्वपूर्ण सीप सिकाएको कालीगढ गङ्गाबहादुर तामाङले बताउनुभयो ।
सामुदायिक विकास केन्द्र नेपालका अध्यक्ष नारायण नेपालले सिकेका सीपलाई बलियो र भूकम्प प्रतिरोधी घर निर्माणमा प्रयोग गरेपछि मात्रै तालिमको यथार्थ देखिने बताउनुभयो ।
केन्द्रले दाङसिङ गाविसमा भूकम्प प्रतिरोधी घर निर्माणको लागि ९० जनालाई तालिम दिइसकेको छ । यस्तै संस्थाले एक सय १० विपन्न परिवारका लागि अनुदानसहित भूकम्प प्रतिरोधी घर निर्माण गर्ने अभियान पनि सञ्चालन गरिरहेको छ । रासस