शनिबार, बैशाख १५, २०८१
काभ्रे प्रहरीले विभिन्न मुद्दामा फरार रहेका तीन प्रतिवादीलाई पक्राउ गरेको छ । सार्वजनिक अपराध मुद्दा, बहुविबाह र बैंकिङ कसुरका गरी तीन प्रतिवादीलाई प्रहरीले पक्राउ गरी सार्वजनिक गरेको छ । पक्राउ पर्नेमा सार्वजनिक अपराध मुद्दामा फरार रहेका भुम्लु गाउँपालिका वडा नं ८ का अनिमेश लामा रहेका छन् ।
लामालाई प्रहरीले ६ वर्षपछि पक्राउ गरेको हो । सार्वजनिक मुद्दामा लामालाई जिल्ला अदालत काभ्रेले २०७२ माघ १० गते सजायको फैसला सुनाएको थियो । अदालतको फैसलापछि फरार रहेका लामालाई जिल्ला प्रहरी कार्यालय काभ्रेले भुम्लु गाउँपालिका वडा नं ८ बाट आज पक्राउ गरेको हो ।
त्यस्तै भुम्लु गाउँपालिकाको वडा नं ८ का कान्छाराम माझीलाई पनि प्रहरीले पक्राउ गरेको छ । उनी वहुविवाह मुद्धका फरार प्रतिवादी हुन् । बहुविवाह मुद्दामा २०७७ पुस ६ गते जिल्ला अदालत काभ्रेले सजायको फैसला गरेको थियो ।
अदालतको फैसलापश्चात फरार रहेका माझीलाई जिल्ला प्रहरी कार्यालय काभ्रेले आजै पक्राउ गरेको हो । यस्तै बैंकिङ कसूर मुद्दामा फरार रहेका रोशी गाउँपालिका वडा नं ५ का मेख बहादुर लामालाई पनि पक्राउ परेका छन् । विभिन्न मुद्दामा फरार रहेका प्रतिवादीहरुलाई पक्राउ गरी फैसला कार्यन्वयनको लागि काभ्रे जिल्ला अदालतमा पेश गरिएको जिल्ला प्रहरी कार्यालय काभ्रेले जनाएको छ ।
