कैलाली । गएराति भारतीय नम्बर प्लेटको कारको ठक्करले कैलालीमा एक साइकल यात्रीको मृत्यु भएको छ ।
ठक्करबाट दुई जना घाइते भएका छन् । टीएस ०८ जिबी ६५३७ नम्बरको भारतीय कारको ठक्करबाट लम्कीचुहा नगरपालिका –१ का ६० वर्षीय कुलचन्द्र जोशीको मृत्यु भएको हो ।
गाडीको ठक्करबाट गम्भीर घाइते भएका जोशीको टीकापुर अस्पतालमा उपचारको क्रममा मृत्यु भएको हो । लम्कीचुहा नगरपालिका –१० का ४२ वर्षीय भुवन जोशीले चलाएको सो कारले लम्कीचुहास्थित मोतीपुर चौकमा ठक्कर दिएको थियो ।
पूर्व–पश्चिम राजमार्गमा पूर्वतर्फ जाँदैगर्दा सो कारले जोशीलाई ठक्कर दिएको जिल्ला प्रहरी कार्यालयका प्रवक्ता प्रहरी नायब उपरीक्षक कुलदीप चन्दले जानकारी दिए ।
साइकलयात्रीलाई ठक्कर दिनुभन्दा अगाडि नै सोही कारले लम्कीचुहा नगरपालिका –६ मा दुई जनालाई ठक्कर दिएर भागेको थियो । ठक्करबाट ५५ वर्षीय मनिराम चौधरी र ५० वर्षीय ठग्गु चौधरी पनि घाइते भएका थिए ।