आइतवार, बैशाख १६, २०८१
काठमाडौं ।१७ कात्तिकमा जाजरकोटको रामीडाँडा केन्द्रबिन्दु बनाएर गएको भूकम्पबाट घरबारविहीन भएका पीडितहरु अझै पाल टाँगेर बसेका छन् ।
सरकारले अस्थायी टहरा निर्माणमा ढिलाइ गर्दा जाजरकोट र रुकुम पश्चिमका भूकम्प पीडित थप समस्यामा परेका हुन् । चिसोका कारण उनीहरुको दैनिकी कष्टकर बनेको छ । चिसोकै कारण केहीले ज्यान गुमाइसकेका छन् ।
हालसम्म रुकुम पश्चिममा चार हजार अस्थायी टहरा निर्माण भएको छ । करिब २६ हजार घरपरिवार घरबारविहीन छन् । जाजरकोटमा पनि रुकुम पश्चिमकै हाराहारीमा अस्थायी आवास बनेका छन् । जिल्ला प्रशासन कार्यालयका अनुसार अहिलेसम्म जाजरकोटमा जम्मा चार हजार १७१ वटा मात्रै अस्थायी आवास बनेका छन् । जबकि जाजरकोटमा ३३ हजार बढी घरहरूमा भूकम्पले क्षति पुर्याएको छ ।
केन्द्र सरकारले अस्थायी आवास निर्माण गर्नका लागि दुई चरणमा गरेर ५० हजार रकम दिने निर्णय गरेको छ । तर अहिलेसम्म सरकारले दिने पहिलो किस्ता (२५ हजार रुपैयाँ) नपाएको गुनासो पिडितहरुको छ
पुस, माघको चिसो दिनानुदिन बढ्दै छ । तत्काल ओत लाग्ने ठाउँ नभएसम्म ज्यान थप जोखिममा पर्ने देखिन्छ। स्थायी टहरा निर्माणमा सरकारले चासो दिएन जसले गर्दा भूकम्पपीडितहरूको बिचल्ली भइरहेको छ ।
जाजरकोटको रामीडाँडा केन्द्रविन्दु भएर गएको ६.४ रेक्टर स्केलको भूकम्पमा १ सय ५३ जनाले ज्यान गुमाएका थिए ।
